Vilt þú að rétthugsun yfirtrompi gagnrýna hugsun?

Í umsögn til Alþingis vegna frumvarps um bókun 35 skrifaði ég meðfylgjandi málsgreinar í gær: 

Í raun stöndum við hér frammi fyrir nýrri tegund stjórnkerfis, þar sem lýðræðisleg umræða er leyst af hólmi með tilbúinni hugmyndafræði (pólitískri rétthugsun). Í slíku kerfi er gagnrýnin, skapandi og rökræn hugsun í auknum mæli jaðarsett, ritskoðuð og þögguð niður.  

Þetta nýja stjórnarfar, sem nú teygir anga sína æ lengra inn í stjórnkerfi íslenska lýðveldisins, birtist í fyrrnefndri grundvallarbreytingu á því hvernig lögin verða til. Áður voru lögin sett af þjóðkjörnum fulltrúum almennings, sem svöruðu til ábyrgðar gagnvart borgurunum. Nú verða lög, á sífellt fleiri sviðum, til með allt öðrum aðferðum. Í raun er þetta umbylting á lagasetningu, þar sem lögin verða til hjá embættisveldinu, oft að undangengnum alls kyns „lobbýisma“, þar sem reglurnar eru samdar á bak við luktar dyr, birtar án umræðu og leiddar í lög með stimpli / einföldu samþykki kjörinna þingmanna.

Þegar þetta var skrifað í gærdag datt mér ekki í hug að þá um kvöldið fengi ég fréttir af áþreifanlegu dæmi: Þingsályktunartillaga forsætisráðherra um ,,aðgerðaáætlun gegn hatursorðræðu" er á hraðri leið í gegnum allsherjar- og menntamálanefnd Alþingis. Alls bárust 20 umsagnir, þar á meðal frá Málfrelsi, en nú virðist sem ekki eigi að bjóða öllum á fund nefndarinnar, heldur aðeins þeim sem voru hlynntir tillögunni!

Ég hvet alla sem vettlingi geta valdið til að senda inn umsögn til að andmæla þessum vinnubrögðum:

https://www.althingi.is/thingnefndir/viltu-senda-umsogn/leidbeiningar-um-umsagnir-um-thingmal/

 

ES. Eftir birtingu þessarar færslu benti glöggur maður mér á að umsögn Málfrelsis um þessa þingsályktunartilllögu forsætisráðherra er ekki að finna á vef Alþingis um innsend erindi og umsagnir vegna málsins (795. mál). Umsögn félagsins er heldur ekki tilgreind í minnisblaði forsætisráðuneytisins um viðbrögð við innsendum umsögnum um málið sem ráðuneytið sendi allsherjar- og menntamálanefnd í gær, 8. maí 2023.