Innri og ytri ógnir við sjálfstæði Íslands (Fyrri og seinni hluti)

Í vikunni hefur Morgunblaðið birt tvær greinar sem líta má á sem eina samhangandi heild. Umfjöllunarefnið er það sem kalla má innri og ytri ógnir við sjálfstæði Íslands. 

Í seinni greininni er efnið dregið saman með eftirfarandi orðum:

Við stöndum frammi fyrir ríkisvaldi sem er um það bil að verða stjórnlaust, þar sem allar þrjár greinar ríkisvaldsins hafa teygt sig of langt. Þetta veldur slagsíðu sem mun leiða til stjórnarfarslegs hruns ef ekki verður gripið í taumana. Þetta valdafyllerí verður að stöðva og það getur enginn gert nema almenningur í þessu landi sem verður að beina geislum dagsljóss að illkynja samgróningum milli stjórnmála og hagsmunaafla; kasta af sér þrúgandi oki valdhafa sem ganga stöðugt lengra í frelsisskerðingum með útþenslu regluverks, aukinni skattlagningu, fleiri eftirlitsmyndavélum, „forvirkum“ hlerunum o.fl. Þetta verður ekki gert utan frá, þ.e. með því að kvarta í útvarpsþáttum, á fésbókinni eða í afmælisveislum. Nei, þetta verður aðeins gert innan úr hinum pólitíska heimi, nánar tiltekið með því að skynsamt og ábyrgt fólk stígi inn á hinn pólitíska vettvang og hreinsi burt þá myglu sem of lengi hefur grafið þar um sig í loftleysi og myrkri. Hvatning til verka Hlutverk almennings/kjósenda/ íslenskrar þjóðar er annað og meira en að mæta á kjörstað á fjögurra ára fresti og fjármagna ríkisbáknið þess á milli með skattgreiðslum. Hlutverk okkar er að halda ríkinu í skefjum. Ríkinu er ætlað að þjóna borgurunum, en ekki öfugt. Til að þetta takist þurfa menn að virða stjórnarskrána, en ekki misvirða hana. Það er kominn tími til að við, almennir borgarar þessa lands, tökum höndum saman og sýnum í orði og verki að okkur er sannarlega annt um íslenskt lýðræði, lýðveldið okkar, sjálfstæði íslensku þjóðarinnar og þann dýrmæta sjálfsákvörðunarrétt sem frelsi okkar og mannréttindi grundvallast á.

(Smellið á myndirnar til að stækka og lesa)

Athugasemdir

[Guðjón Pálsson (IP-tala skráð) 12.11.2023 kl. 08:33]

Það er sérstakt að lesa eigin hug úr orðum einhvers annarrs. Sjaldan, jafnvel aldrei, hef ég jafnoft, í svo mörgu, á dýptina og breiddina, verið á sama máli og þú.

Hugsun þín, orðun og hugmyndir eru staðfesting á því að maður er ekki einn utan mengisins. Þar sem sjálfstæðir menn biðja daglega Guð um að forða sér frá því að góða fólkið í menginu vilji þeim það allra besta.

Það er mikilvægt að hafa í huga að aðstæðurnar sem þú lýsir eru ekki einstakar fyrir landið okkar. Í mörgum löndum eru vaxandi áhyggjur af samþjöppun valds í höndum fárra og rof lýðræðislegra stofnana. Staðan eykur margfalt áhættuna hér í okkur þrönga tengsla-samfélagi.

Einstaklingarnir sem við felum sjálf í hugtökunum stjórnmálamenn og embættismann - 'alast upp' á svipan hátt og einstaklingar í öðrum geirum hér á landi vegna áhrifa frá útlöndum - þar sem heimspeki, iðnaður og hervald eru rætur sama trés.

Vegna okkar eigin siðglapa, vítaverðs siðferðilegs kæruleysis, aðstoðum við þessa nafnlausu einstaklinga í því að koma sér undan ábyrgð.

Þú nefnir að lausnin á þessu vandamáli liggi í stjórnmálaheiminum og að skynsamt og ábyrgt fólk verði að stíga inn á hinn pólitíska vettvang til að knýja fram breytingar.

Þetta er göfugt markmið en það er mikilvægt að muna að breytingar eru ekki auðveldar og að þær krefjast oft viðvarandi átaks yfir langan tíma. Þú þarft stuðning og þú hefur hann í ólíku formi.

Það er líka mikilvægt að muna að breytingar geta komið úr mörgum mismunandi áttum og að það eru margar leiðir til að hafa jákvæð áhrif á heiminn í kringum okkur.

Við vitum til dæmis öll að ríkið er of stórt, án ábyrgðar, án heilstæðrar framtíðarsýnar, yfirlætisfullt og dýrt. Þetta eru ástæðurnar fyrir því að erfitt er að átta sig á tilganginum - sem skýrir skrítnu leiðirnar sem valdar eru og stefnulaus vinnubrögðin.

Þú ert hugrakkur og skynsamur og þú veist að fjöldi manna (af báðum kynjum) eru með þér í huganum.

Við sem erum utan mengisins, eðli málsins vegna, nýtum tímann í stað þess að eyða honum í áróður gegn öðrum einsog þau sem eru innan mengisins.

Þessvegna viljum við sterka leiðtoga til að leiða skipulagið með okkur - borgurunum!

Óskum okkur góðs gengis í viðleitni okkar til að hafa áhrif í jákvæða átt.