Arnar Þór Jónsson

27.12.2023 | 10:36

Hvaða mynd blasir hér við?

Þegar við nálgumst árslok 2023 er vel við hæfi að íhuga það sem gerst hefur, skoða stóru myndina og hvernig tengja megi punktana saman, jafnvel þótt okkur sé sagt að þeir séu ótengdir:

Í hvað fara allir milljarðarnir sem Íslendingar og aðrar þjóðir hafa sent til Úkraínu? Hverjir ætla að hagnast á enduruppbyggingu landsins? Hverjir ætla að gína yfir frjósömu ræktarlandi þar þegar stríðinu lýkur? Frammi fyrir þeim svartilraunum sem komið hafa fram og lesa má um t.d. hér, er verið að nota alþýðu manna í Úkraínu sem fallbyssufóður í stríðinu og síðan sem gólfmottur að hildarleiknum loknum. Úkraínustríðið hefur nefnilega ekki aðeins valdið dauða, örkumlun, sundrun fjölskyldna, hungri og fátækt, nei stærstu vogunarsjóðir heims hafa hagnast um milljarða á hækkuðu matvælaverði í kjölfar stríðsins. Hvað með stærstu fyrirtæki heims, skyldu þau ekki hafa tapað (eins og allir aðrir) á því að efnahagskerfi heimsins var stöðvað með valdboði stjórnvalda vegna Covid-19? Ef marka má þetta yfirlit hér, þá verður ekki annað séð en að stærstu lyfjafyrirtækin hafi blómstrað, sem og hergagnaframleiðendur og bankar. Á sama tíma er metfjölgun í gjaldþrotun lítilla fyrirtækja og milljónir fjölskyldna misstu framfærslu sína. Segir Ríkisútvarpið fréttir af þessu fólki? Eða hefur sú fréttastofa eins og reyndar allar stærstu fréttastofur heimsins horft fram hjá þeim skaða sem sóttvarnaaðgerðir ullu um allan heim? Hefur Ríkisútvarpið sett peningaprentun stjórnvalda í samhengi við verðbólgubálið sem nú logar um allan heim og étur upp eignir millistéttarinnar en belgir út og fitar fjármálafyrirtækin? Setja fréttastofur aukna fátækt á Vesturlöndum í eitthvert samhengi við aðgerðir stjórnvalda, sem á sama tíma ganga sífellt lengra í álagningu skatta og gjalda?

En aftur að fyrri spurningu: Hver hagnast? Jú, svo virðist sem örfáir milljarðamæringar hafi hagnast vel í þessu manngerða umróti, sbr. m.a. þessa skýrslu hér um hagnað stærstu matvælafyrirtækja heims og þessa frétt hér um methagnað tæplega 100 stærstu hlutafélaga í Bandaríkjunum á árinu 2021. Er hugsanlegt að þessi hagnaður sé kreistur fram með því að traðka á lágstéttinni og blóðmjólka millistéttina? Í leit að svörum við því hverjir kunna að hafa grætt á öllu þessu, þá er athyglisvert að sjá að auður efnuðustu manna heims virðist hafa aukist um 3,9 trilljónir bandaríkjadala frá 18. mars til 31. desember 2020 og að 10 ríkustu menn heims auðguðust um 540 milljarða dollara á sama tíma.

Eru einhverjar líkur á að fjallað verði um svona málefni í fréttaannál RÚV um áramótin?

Flokkur: Bloggar | Facebook

Athugasemdir

Það væri líka sniðugt að fylgjast með eignum ráðamanna á Íslandi, þar sem þeir geta ekkert setið á sér að eyða þessum milljörðum sem þeir stela af okkur beint í gegnum Úkraníu-þvottavélina.

Það er enginn að fylgjast með því.

Ásgrímur Hartmannsson, 27.12.2023 kl. 17:49

Getum við ekki sjálfum okkur um kennt? Við veljum að trúa á hamfarahlýnun. Við völdum að trúa á heimsfaraldur. Við veljum að trúa á ágæti vopnaskaks í stað friðarviðræðna og þess að staðið sé við gerða samninga. Við veljum að flokka í tíu tunnur. Við veljum að kalla eftir vindmyllugörðum. Við veljum stjórnmálamenn sem lofa okkur hærri sköttum og meiri miðstýringu. Við veljum að trúa, blekkjast, sannfærast og glepjast, ítrekað. Og svo veljum við að trúa fjölmiðlunum þegar þeir kalla sjálfstæða hugsun samsæriskenningar og upplýsingaóreiðu.

Geir Ágústsson, 27.12.2023 kl. 18:31

Höggormurinn sagði við Evu, í Aldingarðinum Eden, það sem olli fráhvarfi mannanna frá Guði: Vissulega munuð þið ekki deyja! En Guð veit, að jafnskjótt sem þið etið af honum (ávextinum), munu augu ykkar upp ljúkast, og þið munuð verða eins og Guð og vita skyn góðs og ills.

Viljum við halda áfram að trúa höggorminum, og því að menn hafi stjórn á loftslagi jarðarinnar, en ekki Skapari himins og jarðar.

Ennþá getum við valið að gera iðrun og trúa Drottni Guði og tekið á móti þeim blessunum sem Hann þráir að veita okkur í Jesú Kristi.

Í Síðari Krónikubók stendur:

Þegar lýður minn, sá er við mig er kenndur, auðmýkir sig, og þeir biðja og leita auglitis míns og snúa sér frá sínum vondu vegum, þá vil ég heyra þá frá himnum, fyrirgefa þeim syndir þeirra og græða upp land þeirra. (2. Krón. 7:14).

Guðmundur Örn Ragnarsson, 28.12.2023 kl. 00:10