Hvað gerðist?

Í kosningabaráttunni gagnrýndi ég íslenska fjölmiðla fyrir að fóðra okkur á rusli til að halda okkur í myrkinu. Þessi orð, sem ég stend við, rifjuðust upp þegar ég sá meðfylgjandi mynd fyrr í dag, sem stafar frá VAERS í Bandarikjunum (Vaccine Adverse Reporting System), en myndin birtir tölfræði um tíðni andvana fæðinga og fósturlát í Bandaríkjunum á árunum 1990-2022. Hvað gæti hafa gerst sem veldur því að tölurnar hækka svo geigvænlega á árunum 2021 og 2022? 

Á sama tíma rifjast upp fréttatími RÚV frá árinu (2021) þar sem þungaðar konur biðu í langri röð eftir að láta sprauta sig með lyfi sem RÚV og aðrir fjölmiðlar höfðu lofsamað fyrir að veita vörn gegn "veirunni skæðu". Frétt RÚV gekk út á að sýna að þessar konur hefðu orðið fyrir "mjög óþægilegri reynslu" þegar kona sem ekki var komin til að sprauta sig vildi vara þær við að þiggja sprautuna. Konan sem mælti fram viðvörunarorðin var sýnd bæði í hljóði og mynd. Sömuleiðis minnir mig að sýnt hafi verið þegar lögregla kom á vettvang og fjarlægði hana svo að lyfjagjöfin gæti haldið áfram ótrufluð. Þessi sama sjónvarpsstöð leyfir dæmdum glæpamönnum að hylja andlit sín þegar myndir eru birtar af þeim í fréttatímunum, en áhyggjufulla konan naut ekki slíkra réttinda. Miðaði framsetning fréttastofunnar að því að birta upptökuna sem víti til varnaðar fyrir aðra sem vildu mæla fram viðvörunarorð? 

Í ljósi meðfylgjandi tölfræði frá VAERS væri kannski full ástæða til að fréttastofan færi ofan í saumana á framsetningu sinni og jafnvel ræddi við mótmælandann um hvað það var sem hún vissi en fréttastofan vissi ekki?

E.S. Um nýja ríkisstjórn ætla ég að skrifa síðar, en sérhver þjóð fær auðvitað þá valdhafa sem hún á skilið. Guð blessi Ísland. 

 

Athugasemdir

[Jónatan Karlsson, 23.12.2024 kl. 14:13]

Heyr heyr Arnar Þór.

Áfram veginn og gleðilega hátíð.

[Glúmm (IP-tala skráð) 23.12.2024 kl. 21:13]

VAERS er einföld söfnunargátt, öllum opin í Bandaríkjunum, en ekki gagnagrunnur. Þangað geta allir í Bandaríkjunum sent inn grunaðar aukaverkanir lyfja. Upplýsingar í VAERS hafa ekki verið yfirfarnar og óvíst hversu mörg tilfelli eru tilkynnt af fleiri en einum aðila og hvort tilfellin séu yfir höfuð til. VAERS náði miklum vinsældum meðal andstæðinga bóluefna á árunum 2021 og 2022 því hver sem er getur sent inn eins margar tilkynningar og hann vill. VAERS er því tilvalið verkfæri fyrir þá sem stunda rangfærslur, blekkingar og fals. Það var auðvelt að láta líta svo út sem tilfelli væru mjög mörg. Hjá andstæðingum bóluefna hefur minna farið fyrir upphrópunum á niðurstöðum eftir að búið er að sortera frá tilfelli eins og þau sem tilkynnt voru oft, tilfelli þar sem ekki hafði verið um bólusetningu að ræða og tilfelli þar sem sá sem fyrir aukaverkunum varð var ekki til. Það er hæpið að Andrés Önd hafi fengið bólgur í gogginn, Tarsan ilsig og Mína Mús misst fóstur eftir bólusetningu með Phiser. En hvort svo sé eða ekki sést ekki í VAERS, þar sjást aðeins tilkynningarnar.

Sérhver þjóð fær auðvitað þá valdhafa sem hún á skilið og hafnar þeim sem henni eru ekki boðlegir. Guð blessi Ísland.

[Arnar Þór Jónsson, 24.12.2024 kl. 09:25]

Glúmm, óléttum konum hefur verið ráðlagt að forðast tóbaksreyk, áfengi og sumar matvörur á meðgöngu og fara varlega í alla lyfjainntöku, en allt í einu var þessu snúið við og barnshafandi konum ráðlagt að fara í þessar sprautur, þótt lyfin hefðu ekki verið fullrannsökuð. Þú hefur ekki sérlega góðan málstað að verja og því kannski skiljanlegt að þú felir þig á bak við nafnleynd.

[Arnar Þór Jónsson, 24.12.2024 kl. 09:52]

Þessi hætta er kortlögð í skjölum frá Pfizer sjálfu, sjá: https://phmpt.org/wp-content/uploads/2021/11/5.3.6-postmarketing-experience.pdf þar sem skráð voru 274 "adverse effects" á meðgöngu, þar af voru 27% talin alvarleg.

Sjá einnig: 

[Glúmm (IP-tala skráð) 24.12.2024 kl. 13:47]

Minn málstaður er einfaldlega að menn fari rétt með tölur og séu ekki að nota ómarktæk gögn. Í VAERS eru eins ómarktæk gögn og skoðanakannanir á Útvarpi Sögu. Þú fékkst ekki 77,5% atkvæða í forsetakosningunum eins og mátti búast við miðað við Útvarp Sögu. Að nota VAERS sem sannanir og rök er eins og að nota Útvarp Sögu. Tölfræði frá VAERS og Útvarpi Sögu eru ekki ástæður til að fréttamenn fari í saumana á einhverju.  Notaðu marktæk gögn, er minn málstaður. Og finnist þér hann ekki góður þá segir það meira um þig en þú hefur viljað viðurkenna en flestir hafa tekið eftir.

###skráð voru 274 "adverse effects" á meðgöngu, þar af voru 27% talin alvarleg###  þarna vantar hjá þér fjölda bólusettra. Voru þetta 274 af 1000 bólusettum? Voru þetta 274 af 10.000 bólusettum? Voru þetta 274 af 1.000.000 bólusettum? Það er til dæmis mikill munur á því hvort þarna séu 274 af þúsund eða 274 af milljón. Og 27% virðist há tala en hún er af öðru hlutfalli sem þú gefur ekki upp, ekki af heildinni. Og sem dæmi þá eru 27% af 0,0001% heildarinnar allt annað og minna en 27% af 10% heildarinnar. Hvergi kemur fram hjá þér hversu algengar, eða sjaldgæfar, aukaverkanir eru hjá bólusettum óléttum konum. Skila þessi 27% af annarri ósagðri prósentu sér í því að hér megi búast við því að ein ófrísk kona verði fyrir alvarlegum aukaverkunum í hverri viku eða er það ein kona á hverjum 10.000 árum?

[Arnar Þór Jónsson, 24.12.2024 kl. 14:50]

Glúmm, þessi skýrsla sem þú ert að tala um nær yfir örstutt tímabil, þ.e. frá 1.12.2020 til 28.2.2021. Heildarfjöldi sprautuskammta er ekki gefinn upp en alls bárust 42.086 tilkynningar (þar af 25.379 staðfestar af læknum) um samtals 158.893 aukaverkanir. Þarna hefði átt að stöðva lyfjagjöfina, en það var ekki gert vegna þess að menn voru í afneitun. Hafi það verið afsakanlegt þá er erfitt að skilja hvernig þú getur verið í afneitun í árslok 2024. 

Ef þú vilt berja hausnum í steininn, þá er til nóg lesefni fyrir þig, t.d. þessi rannsókn hér:  https://papers.ssrn.com/sol3/papers.cfm?abstract_id=3998180

Pfizer hafði ekki gert rannsóknir á barnshafandi konum áður en lyfin fóru í umferð, heldur aðeins gert rannsókn á 44 kvenrottum, en sú rannsókn stóð aðeins yfir í 42 daga og niðurstöðurnar voru að "birth defects" fjölgaði um 295%. 

En traust þitt til lyfjaframleiðslufyrirtækja virðist vera algjörlega blint. Það er ekki hollt fyrir þig. Skoðaðu við tækifæri lækkandi fæðingartíðni í mismunandi löndum, sérstaklega hrunið sem virðist hafa orðið eftir að sprautuherferðin hófst.

P.S. Kannski er ég ósanngjarn þegar ég segi þig vilja berja hausnum í steininn. Eg er sjálfur sekur um það þegar ég reyni að sýna þér og öðrum það sem þú vilt ekki sjá!