Endar þetta með því að fé til vopnakaupa verður sótt í lífeyrissjóði landsmanna?

Rúv er meinvarp í þjóðarlíkamanum. Ef staðfest verður að starfsmenn þar hafi átt þátt í símhlerun verður verður að loka stofnuninni því engin þjóð verður krafin um að fjármagna ríkisstofnun sem er ógnvaldur við fólkið í landinu. Það gladdi mig að sjá Snorra Másson gera málefni RÚV að umfjöllunarefni i fyrradag og ég var 100% sammála honum um mikilvægi þess að leggja niður fjölmiðlanefnd enda bergmálaði Snorri mín orð um Cato hinn gamla sem rituð voru á þessu bloggi fyrir nokkrum dögum. Öllum er frjálst að nota efni þessa bloggs og gera orð mín að sínum í þágu góðs málstaðar. 

Ríkisrekinn fjölmiðill er tímaskekkja í landi sem kallast vill frjálst. RÚV hefur árum saman verið í herkví tiltölulega fámenns hóps starfsmanna þar sem telja sig ekki bara hafa höndlað sannleikann, heldur telja sig bera einhvers konar heilaga skyldu til að boða þann sannleika dag og nótt, án auðmýktar, án hógværðar og án þess að leiðrétta sig þegar í ljós kemur að þau hafi farið með rangt mál. Dagskrárgerðarmenn Rúv eru sérlegir áhugamenn um "samsæriskenningar". Ég hvet þau - og alla lesendur - til að spyrja gervigreindina um samsæriskenningar sem reynst hafa réttar. Listinn er svo langur að ég hélt að gervigreindin ætlaði aldrei að hætta. Á slíkum lista er margt fróðlegt að sjá, sem við hér á Fróni, sem lifað höfum á einhæfu fréttafóðri um áratugaskeið, vitum ekkert um. Þannig kom mér á óvart að sjá gervigreindina greina frá því að tilteknar kenningar hefðu reynst á rökum reistar. Hver sem er getur leitað eftir lykilorðum á borð við MK ultra (CIA mind control), Operation Nortwoods, NSA mass surveillance (afhjúpanir Edward Snowden). Þá eru ótaldar fréttir Rúv af uppruna Covid 19, en fréttastofan vildi ríghalda í að veiran hefði komið frá leðurblökumarkaði en ekki rannsóknarstofu í Wuhan; um það hvernig Rúv (með aðstoð fjölmiðlanefndar sem leitaði aðstoðar Fésbókar sem vann með leyniþjónustu BNA) tók þátt í að berja niður efasemdir og heilbrigða gagnrýni (ritskoðunarstefna); hvernig gagnsemi bóluefna var ýkt og fegruð en náttúrulegt ónæmi talað niður; um víðtækan, fjölþættan og langvarandi skaða af samfélagslokunum; um skaðsemi bóluefna gegn covid 19; um það hverjir högnuðust mest á covid-hysteríunni. 

Og núna þegar m.a.s. gervigreindin viðurkennir að ríkisstyrktir fréttamiðlar hafi margvíslega afvegaleitt okkur síðustu árin, þá er kannski best fyrir Rúv og aðra (falsfrétta)miðla að svara engri gagnrýni og / eða beina athyglinni annað, svo sem að "nauðsyn" þess að hefja stríðsrekstur fyrir almannafé. Tómir ríkissjóðir geta að vísu ekki staðið undir vopnakaupum fyrir hundruðir milljarða evra, en það er aukaatriði virðist vera. Hér verður settur fram sá spádómur að ef stríðsæsingarnar halda áfram og íslenska ríkið verður áfram gert ábyrgt fyrir kaupum á fleiri vopnum eins og (ó)ráðamenn okkar virðast staðráðnir í, þá muni þetta enda með því að vopnaframleiðendur fái aðgang að lífeyrissjóðum Íslendinga, því annað er ekki til reiðu hér.

 

 

Minnisblöðum ber illa saman við orð ráðherra

Athugasemdir

[Grímur Kjartansson, 7.3.2025 kl. 09:18]

Þetta er bara rétt að byrja því í gær samþykkt ESB að bæta við vopnakaupin 118.000.000.000  kr

"Leðtogarnir" munu síðan þurfa réttlæta þessi fjárútlát með að kynda undir stríðsátök sem RUV mun réttlæta í nafni frelsis og hugsjóna hins frjálsa heims þar sem ekki verður leyft að kaupa amerískar vörur því Trump er í rassvasanum á Pútín

[Trausti (IP-tala skráð) 7.3.2025 kl. 16:51]

Það lítur út fyrir að nýja ríkisstjórnin hafi verið sótt af Kleppi og eina sem þessum valkyrjum vantar eru hvítu slopparnir! Ísland lifir ekkert af sem samfélag að hafa þetta þríeyki við völd í 4.ár... En ég er ekki að sjá að almenningur gerir eitthvað enda flest allir límdir fyrir framan RÚV heilaþvegið eins og á Covid tímabilinu takandi lygaþvæluna upp í nösina eins og versti eiturlyfjasjúklingur... Þó svo að það var annarsskonar þríeyki sem var við völd þá er sami heilaþvotturinn í gangi bara annað viðfangsefni.

[Guðmundur Ásgeirsson, 7.3.2025 kl. 23:31]

Ef samsæri er raunverulegt er það ekki kenning heldur staðreynd. Hamingjuóskir til þeirra sem hafa nú þegar áttað sig á þessu.

[Arnar Þór Jónsson, 8.3.2025 kl. 09:38]

Ég þakka málefnalegar athugasemdir. 

Guðmundur, þú ert þá væntanlega sammála því að meðan heildarmyndin er ekki komin í ljós ættu fjölmiðlar og aðrir að nálgast viðfangsefni sín af auðmýkt og fara varlega í að nota orð eins og samsæriskenningar, m.a. vegna þess að slík orðnotkun grefur undan trausti á þeim sem þannig talar, þ.e. ef meint samsæriskenning reynist vera staðreynd.

[Guðmundur Ásgeirsson, 8.3.2025 kl. 15:54]

Já ég er sammála því að fjölmiðlar eiga að nálgast málefni með opnum huga og ekki beita sleggjudómum til að afskrifa mögulegar skýringar með því að stimpla þær sem "samsæriskenningar" á meðan ekki er ljóst hvað býr að baki atburðum.