Allt fyrir samansúrrað pólitískt og peningalegt vald

Mesta niðurlægingartímabil í Íslandssögunni eru sennilega 17. og 18. aldirnar, þar sem örsnauður og varnarlaus almúgi dró fram lífið í þrældómi, kulda og vosbúð, þar sem bændur og embættismenn ráðskuðust með daglegt líf fólks, á sama tíma og Alþingi var lítið annað en innantóm skel, þar sem löggjafarstarf fólst í að innleiða tilskipanir erlends konungsvalds samhliða því að kveða upp harða dóma yfir smælingjum sem í neyð sinni höfðu tekið snæri eða fiskroð sér til lífsbjargar. Um þetta má lesa í alþingisbókum sem til eru á prenti og víða aðgengilegar.

Niðurlæging Sovét-"lýðveldanna" á 20. öld birtist daglega í lyginni um að þau væru sjálfstæð og lýðræðisleg, því þjóðþing þeirra voru innantómar skeljar og öll raunveruleg völd voru í höndum kommúnistaflokksins sem var undir stjórn Moskvu. Ef leiðtogar þessara þjóða sýndu óhlýðni, sbr. t.d. Ungverjaland 1956 og Tékkóslóvakía 1968, gripu Sovétríkin til hernaðaríhlutunar.

Þjóðþingin, eins og Volkskammer í Austur-Þýskalandi eða Sejm í Póllandi, settu vissulega lög, en þau voru öll ákveðin af valdaflokknum, sem hélt um alla þræði og gætti þess að engir utanaðkomandi óþægilegir menn kæmust nærri þessu valdi. Umræður voru táknrænar og andstöðuatkvæði höfðu engin raunveruleg áhrif. Þessi ríki gátu státað af fallegum stjórnarskrárákvæðum um lýðræði og mannréttindi, en í raun voru öll völd í höndum lokaðrar flokks-klíku, sem hafði meiri áhuga á að verja eigin hagsmuni en hagsmuni almennings. Dómstólar voru ekki sjálfstæðir og voru notaðir til að þagga niður í stjórnarandstæðingum. Ritskoðun var algjör og fjölmiðlar voru notaðir sem áróðurstæki. Saga þjóðanna var endurskrifuð til að samræmast hugmyndum valdhafa og eyða þjóðlegum hefðum sem gengu gegn ríkjandi hugmyndafræðilegri kreddu. Í stuttu máli höfðu þessi ríki ásýnd sjálfstæðra ríkja með sínar eigin ríkisstjórnir, en í reynd voru þær aðeins leppstjórnir, framlenging á valdinu í Moskvu. 

Allt framangreint kemur upp í hugann þegar skoðuð er mynd af embættismönnunum í sameiginlegu EES nefndinni sem fyrr í þessari viku hittust til að "segja JÁ" (aldrei "NEI") við þykkum bunka af regluverki frá valdinu í Brussel, en samtals voru í bunkanum 79 reglugerðir og tilskipanir frá ESB. Í framhaldinu verða sumar þeirra sendar Alþingi til samþykktar, formsins vegna, en aðrar þurfa engan gúmmístimpil þaðan. Hvert er þá hlutverk Alþingis í þessu ferli? Getur það neitað að samþykkja? Í leit að svörum er nærtækast að rifja upp hvað sagt var þegar þriðji orkupakkinn barst Alþingi til samþykktar árið 2019: Þá var sagt "útilokað" að Íslendingar gætu fengið undanþágu frá innleiðingu þriðja orkupakkans. Í viðtali við Rúv bætti fræðimaður í Evrópurétti við: „Það er náttúrulega nú þegar búið að semja á vettvangi sameiginlegu EES nefndarinnar um upptöku löggjafarinnar í EES-samninginn og við fengum ákveðnar undanþágur“ [...]] "Það myndi því ekki skila neinu að senda málið aftur þangað." Þarna er verið að lýsa mulningsvél, en ekki sjálfstæðu, lýðræðislegu lagasetningarferli.

Mikilvægt er að rifja þetta upp núna þegar Alþingi hyggst samþykkja frumvarp utanríkisráðherra um bókun 35, sem gerir varnir Íslands enn veikari en áður og mun auðvelda umbyltingu raforkumarkaðar hérlendis með stórfelldi hækkun raforkuverðs til heimila og fyrirtækja, en þegar munu vera komnar fram 36 eða 37 umsóknir um vindorkugarða víðsvegar um landið og allir þessir garðar nema 2 munu verða í eigu erlendra aðila. Í þessu ljósi er mögulega hægt að ímynda sér hvaðan þrýstingurinn kemur á alþingismenn að samþykkja frumvarpið sem allra fyrst.

Ásýnd Íslands mun breytast hratt þegar farið verður að "teppaleggja" landið með vindorkugörðum. Fjárfestar og erlend stórfyrirtæki munu hagnast en lífskjör almennings skerðast, "þökk" sé kjörnum þingfulltrúum þessa sama almennings. 

 

 

Athugasemdir

[Ómar Geirsson, 15.3.2025 kl. 12:31]

Blessaður Arnar.

Í fáum orðum segir þú allt sem segja þarf um þá vegferð sem elíta okkar er með þjóðina á.

Fyrir utan að við missum allt sem heitir sjálfræði og sjálfstæði, þá er það ein af staðreyndum sögunnar að útnárar daga alltaf uppi í svona miðstýrðu veldi, og það er óhjákvæmilegt að Snorrabúð verði aftur stekkur.

Hræsnin kristallast svo í því að Sjálfstæðisflokkurinn sem barðist fyrir samþykkt bókunar 35 í síðustu ríkisstjórn, að sama fólk fékk mikið uppklapp á nýliðnu flokksþingi þegar það hrópaði; svo göngum við aldrei í ESB, eins og það skipti einhverju máli eftir að löggjafarvaldinu hefði verið útvistað til Brussel.

Þess vegna þurfti Lýðræðisflokkinn, og það er ennþá mikil þörf fyrir hann.

Kveðja að austan.

[Arnar Þór Jónsson, 15.3.2025 kl. 13:28]

Sæll Ómar.

Já, hinn svokallaði Sjálfstæðisflokkur nútímans hefur grafið undan sjálfstæði landsins í verki en vegsamað það í orði. Ég ber meiri umhyggju fyrir landinu okkar og sjálfstæði þess en nokkrum stjórnmálaflokki, þ.m.t. Lýðræðisflokknum, en já, framboð hans var nauðsynlegt til að geta sagt síðar að allir hafi fengið að heyra viðvörunarorð um hvert stefnir á vakt þeirra sem skiptast á að halda um stýri þjóðarskútunnar þessi misserin. Kær kveðja austur. Arnar.

[Guðmundur Örn Ragnarsson, 15.3.2025 kl. 17:34]

Já, Arnar Þór Jónsson. Sjálfstæðis-aflýsing Íslands virðist framundan.

Höggormurinn talaði fyrrum við Evu, sem þá bjó í Pardís, (eins og við gerum nú á Íslandi), og sagði við hana: “Ef þið Adam gerið eins og ég segi,munu ljúkast upp augu ykkar og þið munuð verða eins og Guð.”

Var þetta satt hjá höggorminum? Nei, það var lygi.

Þau lifðu þá þegar eins og Guð, og gátu ekki haft það betra, enda sköpuð í Hans mynd.

Þau tóku samt við orðum Djöfulsins (Mammons) en höfnuðu samfélaginu við skapara sinn sem gerði þau brottræk úr Paradís.

Við sem lifum nú í íslenskri paradís, erum nú í sömu stöðu og Eva var þegar hún fékk tilboð sitt frá höggorminum. Ætlum við að taka tilboði hans (ESB)?

Ef við gerum það, mun Guð þá ekki einfaldlega skipta um þjóð á Íslandi? Eru umskiptin hafinn?

Höggormurinn er í stöðugu sambandi við okkar íslensku kvenskörunga og segir þeim að þær geti orðið ríkar ef þær falli fram og tilbiðji hann.

Öllum Íslendingum ætti að vera ljóst, ef fram gengur, sem horfir, munum við selja okkur undir drottnara úti í heimi. En er okkur þetta ljóst? Ekki sýndu það úrslit síðustu Alþingiskosninga í lok nóvember.

Tökum afturhvarfi og trúum handleiðslu Guðs vors lands, sem gaf okkur þessa paradís, Ísland, en höfnum handleiðslu Mammons (Djöfulsins, ESB), sem lofar okkur gulli og grænum skógum, ef við afhendum honum ráðin yfir landi okkar og þjóð.

Djöfullinn lýgur.