Verum kurteis og prúð

Þegar ég var barn var mér kennt að þakka Guði fyrir það daglega að hafa fengið að fæðast sem Íslendingur, því hér væri friðsælt og gott að búa, því allt mannlegt líf er dýrmætt. Mér var kennt tala rétt mál og að við ættum að bera virðingu fyrir tungumálinu, sem væri perla sem fágast hefði í aldanna rás og geymdi sögu lands og þjóðar. Mér var kennt að bera virðingu fyrir eignum annarra og fyrir fullorðnu fólki. Mér var kennt að slökkva ekki á sjónvarpinu þegar þjóðsöngurinn var spilaður á sunnudagskvöldum, bera virðingu fyrir fánanum, brjóta hann rétt saman og láta hann aldrei snerta jörð. Mér var kennt um þau gildi sem sameinuðu Íslendinga og markmið okkar sem þjóðar um að vernda landið, vatnið, okkar góðu íslensku matvæli o.s.frv. Mér var aldrei kennt neitt um að við værum betri en aðrar þjóðir, aldrei rætt við mig um hvort ég væri mögulega annað en karlkyns. Ef einhver fullorðinn hefði ætlað að ræða við mig um kynferðismál hefði ég talið hlutaðeigandi stórundarlegan og mögulega háskalegan einstakling. 

En nú virðist umræðan vera komin á allt annan stað. Öllu hér að ofan er snúið á hvolf og allir hvattir til að líta á sig sem fórnarlömb frekar en sem virka þátttakendur í því að byggja upp enn betra samfélag. Allt það sem nefnt var hér í upphafi er nú reynt að útmála sem "öfgar" og að þeir sem vilja vernda íslenska samfélagsgerð séu sjálfkrafa einhvers konar illmenni.

Ég er ekki óraunsær maður, ég geri mér grein fyrir að við Ísland er smáblóm á skógarbotninum þar sem risavaxin og hervædd stórveldi yfirskyggja annan gróður. En þegar erlendar fréttir eru lesnar með morgunkaffinu blasir ekki endilega við að við eigum að keppa að því að verða eins og aðrar þjóðir. Við hljótum að mega vera við sjálf örlítið lengur. Það að vilja að hér sé virk landamæragæsla og að glæpahópar skjóti hér ekki rótum, þýðir ekki að við séum "á móti útlendingum". Við getum fagnað þeim sem hingað vilja flytja, en innviðirnir verða að þola fjölgunina (fjölgun um ca. 80.000 manns a´20 árum leggur pressu á skólakerfi, heilbrigðiskerfi, löggæslu o.fl. og þessir innviðir gætu brotnað ef ekki verður hægt á).

Þetta er ritað hér til að minna lesendur á að næst þegar einhver dregur fram stóra stimpla eins og "öfgar" þá er verið að stöðva umræðuna. Heppilegra væri að ræða saman af yfirvegun og skoða allar hliðar þeirra mála sem til umræðu eru, leyfa spurningar, svara málefnalega og vera kurteis og prúð, eins og okkur var öllum kennt í æsku.