Valkyrjurnar hafa ekki umboð til að gera Ísland að léni innan ESB

Í heimi nútímastjórnmála grípur fólk til afneitunar til að komast hjá því að þurfa að svara fyrir óþægileg mál. Komi síðar í ljós að viðkomandi stjórnmálamaður hefði átt að vita betur, þá er hægt að segja að þetta komi "mjög á óvart". Stjórnmálin líkjast sífellt meir lélegu leikhúsi þar sem handritið er óskrifaður spuni og leikararnir flestir fremur ósjarmerandi og leiðinlegir, sérstaklega "leiðtogar" ESB sem komist hafa til valda þar með því að klifra upp eftir bakinu á ráðamönnum í Þýskalandi og Frakkalandi, án lýðræðislegs umboðs. 

Á Íslandi stöndum við frammi fyrir því að "valkyrjur" ríkisstjórnarinnar hafa fellt leikhúss-grímuna og afhjúpa nú daglega áhuga sinn á því að gera Ísland að léni innan ESB sem formlega mun lúta stjórn frá Brussel.

Öllum má þó vera ljóst að stjórnin hefur þegar verið flutt þar að stóru leyti, í bága við stjórnarskra Íslands, því með vísan til lagatæknilegra sjónarmiða og þess að EES samninginn „beri að vernda“ hefur Alþingi opnað allar flóðgáttir fyrir innstreymi reglna frá ESB í íslenskan rétt og þar með heimilað ESB afskipti af íslenskum innanríkismálum, langt umfram það sem nokkur maður sá fyrir í upphafi, þ.e. við gerð EES samningsins. Allt þetta hefur gerst án nokkurrar raunverulegrar viðleitni til að aðlaga regluverkið íslenskum aðstæðum eða íslenskum hagsmunum.  

Sú þróun sem hér hefur verið lýst felur ekki í sér lagalega hagræðingu, heldur er hér um að ræða kerfisbundinn flutning á lagasetningarvaldi úr landi. Í stað þess að standa vörð um íslenska réttarhefð og sjálfsákvörðunarrétt þjóðarinnar hefur Alþingi sætt sig við það hlutskipti að gerast nokkurs konar regluvörður við færiband erlendrar reglugerðarverksmiðju.

Um þetta mun ég nánar fjalla í grein sem birt verður í Morgunblaðinu á næstu dögum.  

 

 

Von der Leyen kvaðst ekki kannast við kröfuna

Athugasemdir

[Guðmundur Ásgeirsson, 18.7.2025 kl. 22:47]

Stjórnarskráin leyfir ekki aðild Íslands að ESB. Auk þess hafa Íslendingar með afgerandi hætti hafnað órjúfanlegum hluta ESB aðildar tvisvar í bindandi þjóðaratkvæðagreiðslum. Þar með ætti málið að vera löngu dautt.

Kannski skilja ekki allir þetta en þá kemur það í hlut okkar sem þekkjum lögin og söguna að útskýra það fyrir þeim sem kann að skorta þann skilning.

[Arnar Þór Jónsson, 18.7.2025 kl. 23:15]

Þú hefur lög að mæla Guðmundur.

[Guðmundur Ásgeirsson, 18.7.2025 kl. 23:52]

Það er alltaf markmiðið í öllu sem ég geri af alvöru.

Ég stóð ekki í fararbroddi baráttunnar til fullnaðarsigurs í Icesave málinu af neinni léttúð. Það kostaði mig stóran hluta af lífi mínu sem ég fórnaði án þess að taka neina greiðslu fyrir. Með dómi EFTA dómstólsins árið 2013 var loksins staðfest að ég hafði lög að mæla allan tímann um það mál.

Á meðan á þessu öllu stóð var ég eitt sinn spurður að því hvaða verð ég setti upp fyrir að stöðva þær aðgerðir sem við stóðum fyrir einmitt í miðpunkti þeirrar baráttu. Ég var ekki viss hvort það væri grín eða raunveruleg tilraun til að múta mér en svaraði því umhugsunarlaust þannig að eina skilyrðið sem ég setti upp væri að sá sem bæri réttilega ábyrgðina þ.e. bankinn myndi axla hana og greiða sínar réttmætu skuldir við þá sem áttu innstæður í honum. Það gerðist svo á endanum en fáir hafa þakkað mér fyrir það.

Síðan þá hefur komið á daginn að þessari baráttu er hvergi nærri lokið.