Blindur leiðir blindan

Það má kallast dagleg glíma sérhvers hugsandi manns að reyna að skilja á hvaða leið þetta samfélag er, þar sem öllu er snúið á hvolf. Sá sem þetta ritar tilheyrir þeim ört stækkandi hópi almennings sem hefur áttað sig á að það eru ríkisreknir og ríkis-styrktir fjölmiðlar sem mesta ábyrgð bera á öfugsnúningnum. Þessir ,,miðlar" birta daglega fréttir þar sem ljós er kallað myrkur, sá sem vill segja sannleikann má vænta þess að vera sakaður um ,,haturs-orðræðu", stríð er kallað friður og hefðbundið, klassískt frjálslyndi kallað ,,popúlismi" eða ,,hægri-öfgar". Stjórnmálaflokkarnir á Alþingi gleypa skoðanamyndunina hráa og ímynda sér að þeir séu þar með að gera ,,rétt", því mælikvarði þeirra á rétt og rangt grundvallast ekki á neinum prinsippum heldur aðeins á því sem þeir telja til vinsælda fallið á hverjum tíma. Afleiðingarnar má sjá í umræðum á Alþingi og í afgreiðslum þingsins, þar sem blindur leiðir blindan. Eitt nöturlegasta dæmið um þetta er frumvarpið um leigubílaakstur sem Alþingi samþykkti þrátt fyrir aðvörunarorð mín og fjölmargra annarra. Undir gunnfána ,,frelsis á leigubílamarkaði" hefur verið innleitt stjórnleysi, sem skaðað hefur afkomu fjölmargra þeirra sem gert hafa leigubílaakstur að atvinnu sinni, auk þess að skaða traust almennings og ferðamanna til þessarar stéttar. 

Meðfylgjandi skjáskot er af frétt sem birtist á visir.is í gær og veitir vísbendingu um hvers konar lögleysu er unnt að framkalla með lögum sem sett eru af áttavitalausum stjórnmálamönnum.