Hvers konar framtíð kýst þú?

Kæri Íslendingur, eftir allt sem á undan er gengið, allt það sem fulltrúar FLOKKSINS (sameinaða ríkisflokksins á Íslandi) hafa gert til að grafa undan fullveldi og sjálfstæði Íslands og koma okkur undir stjórn ESB, SÞ, WHO o.fl., þá er hér ný ræða frá konunni sem forystumenn FLOKKSINS vilja gera að leiðtoga lífs síns - og okkar hinna. Og það merkilega er að hér lofsamar Úrsúla sjálf mikilvægi fullveldis ... þ.e. fullveldis ESB ... til að ákvarða hvaða lög skuli gilda ,,í Evrópu". Fyrir utan valdhrokann sem skín úr fasi hennar og orðum þá er innihaldið áhyggjuefni, því Úrsúla og co. vilja stjórna því hvað má segja og hvað ekki. Í sömu ræðu talaði Úrsúla um það að ,,víglína hinnar nýju heimsmyndar sé nú í mótun (e. Battle lines for a new world order based on power are being drawn right now). Á þessum grunni eigi ,,ný Evrópa að rísa". 

Finnst þér þetta aðlaðandi framtíðarsýn? Er ákjósanlegt fyrir fullvalda örþjóð að ofurselja sig fjarlægu, miðstýrðu, ólýðræðislegu skrifstofuveldi sem vill hervæðast og beita ritskoðun í þeim tilgangi?

Íslendingar verða að fara að átta sig á að undir yfirborðinu er nú verið að heyja baráttu um skilgreiningarvaldið, þ.e. hverjum leyfist að skilgreina hvað teljist rétt og hvað rangt. Í þessari baráttu nota stórveldi heimsins fjölmiðla, áróður, óttastjórnun o.fl. Þegar almenningur fer að sjá í gegnum áróðurinn og fer að ókyrrast, þá draga valdhafarnir fram stóra trompið: Stríð. Óþægilega umræðu um frelsi og ófrelsi má þá stöðva með ritskoðun og innleiða þess í stað mælikvarða hreinnar valdbeitingar. Þetta er skilvirkasta leiðin í átt til harðstjórnar, þar sem lög eru leyst af hólmi með tilskipunum og regluverkið svo notað til að þagga niður í mönnum, svipta þá frelsi, eignum og jafnvel lífi, leyfa ógn og kúgun í nafni ,,friðar" og að lokum manndráp í þágu ,,réttlætis".  

Í slíkum ósiðferðilegum heimi slást menn og þjóðir um völd. Þar skiptir ekki máli hver málstaðurinn er heldur aðeins hver geti beitt mestu vopnavaldi / ofbeldi. 

Það kann að vera draumsýn ein, en landakortið hér er huggulegra: Ísland utan við átök stórveldanna sem kyndilberi friðar. Enginn veit að vísu hve lengi það væri hægt, en glæslilegt væri að standa meða stætt væri og fara í sögubækurnar fyrir að hafa staðið með friði á ófriðartímum. Í heimi sem er orðinn sturlaður, þar sem stórþjóðir láta leiðast af sturluðu fólki inn í sífellt meira myrkur, illsku, þröngsýni, vopnaskak og átök, veitir ekki af því að til sé a.m.k. eitt land sem haldur á lofti kyndli ljóss, frelsis og friðar. 

 

,,Launaþrællinn hnígur niður lafmóður með ægilegan sting...."

Í framhaldi af stuttri færslu sem birt var hér í gærkvöldi um virðingarleysið og fyrirhyggjuleysið sem íslenska ríkið og lífeyrissjóðir sýna hagsmunum íslenskra launaþræla, þá eru öll teikn á lofti um að sá dagur nálgist nú óðfluga að útúrsprautaður launaþrællinn muni vakna við þær fréttir að ráðstafa eigi hluta af eignum lífeyrissjóðanna til vopnakaupa og stríðsrekstrar. Þann dag mun hinn venjulegi Íslendingur horfa í spegilinn og viðurkenna að hann hafi verið hafður að fífli. 

Í kjölfar þeirrar viðurkenningar munu aðrar sannleiksbombur springa í vitund hans:

• Þingflokkarnir sem nú eiga sæti á Alþingi tilheyra allir einum og sama Flokknum - og eru ekki annað en mismunandi deildir innan hans.
• Rikisreknir og ríkisstyrktir fjölmiðlar hafa selt sálu sína fyrir aðgang að ríkisjötunni.
• Sannleikurinn var fyrsta fórnarlamb ríkisvæðingar fjölmiðlunar og flokksstarfs á Íslandi. Silfurpeningarnir úr ríkissjóði munu ganga af flokkunum og fjölmiðlunum dauðum um leið og almenningur sér og heyrir að þeir tala með klofinni tungu.
• Kynin eru tvö og enginn getur breytt sér úr karli í konu eða öfuggt.
• ,,Bóluefnin" gegn C19 ýttu undir hjartavandamál, Alzheimer, taugaverki, ófrjósemi o.fl., en gerðu lítið / ekkert til að verja okkur gegn ,,kófinu". 
• Woke-kreddan sem heltók íslenskt samfélag 2020 - 2025 verður rannsóknarefni síðari kynslóða og talin merki um alvarlegan skort á sjálfstæðri hugsun / sjúklega meðvirkni / þjóðfélagslega fjöldasturlun. 

[Fyrirsögnin er sótt til spámannlegra orða Megasar, sjá hér].

Allir ánægðir, er það ekki?

Sjóari á fylleríi hefði ekki keypt hlutabréf í Play, en það gerðu ,,sérfræðingar" lífeyrissjóðanna. Eitt mega Íslendingar eiga: Við höfum sérstakt lag á að afhenda fólki peninga og völd, sem kunna hvorki með peninga né völd að fara. Fyrir vikið sitjum við uppi með ofvaxið ríkisbákn og ofvaxna lífeyrissjóði. Á báðum stöðum er fjármunum almennings sýnd lítil virðing. Skattpeningar Íslendinga eru notaðir til að kaupa vopn ,,í friðartilgangi". Lífeyrisgreiðslur eru notaðar til að fjárfesta í fyrirtækjum sem öllum heilvita mönnum er ljóst að eiga ekki framtíð. 

Þá er nú gott að ríkið (og lífeyrissjóðirnir) annað hvort eigi fjölmiðla eða séu í aðstöðu til að hafa áhrif á það hvar fókus fjölmiðlaumræðunnar er hverju sinni, því meðan hægt er að halda almenningi uppteknum við að ræða það sem ekki skiptir máli, þá hafa menn ekki tíma til að taka þátt í pólitískri umræðu og veita aðhald. Fréttir af frægu fólki, beinar útsendingar frá boltaleikjum og ,,skemmtiþættir" í sjónvarpi þjóna mikilvægu hlutverki í þessu tilliti. Meðan almenningur getur notað sjónvarpið til að fá útrás fyrir alls kyns pirring og reiði, þá beinist hann ekki að þeim sem sitja við kjötkatla ríkisins og lífeyrissjóðanna.   

Birta lífeyrissjóður tapar 1,7 milljörðum á Play

Vinsamlegast útskýrið

Enn hefur ekki birst frétt í íslenskum fjölmiðlum um samþykkt þings Slóvakíu, sem ég sagði frá hér í gærkvöldi, en vonandi munu þessir ríkisstyrktu fjölmiðlar reyna að varpa ljósi á mikilvæga spurningu sem þessu tengist:

Hvernig stendur á því að löggjafarþing í ríki sem gerst hefur beinn aðili að ESB vilji verja sögulegar, lagalegar og menningarlegar hefðir með því að láta stjórnarskrána ganga framar ESB rétti ef þetta tvennt rekst á - en að Alþingi Íslendinga, sem ekki gerði annað en að samþykkja viðskiptasamning árið 1993 með vísan til þess að um væri að ræða valdaframsal á mjög afmörkuðu sviði, skuli nú ætla að undirgangast almennan forgang reglna sem eiga sér uppruna hjá ESB ef þær stangast á við innlendan rétt - og að þessi forgangur sé án takmarkana og geti þannig yfirtropmpað stjórnarskrá lýðveldisins, aldagömul lög og einnig síðari tíma lög sem fara í bága við vilja Brussel valdsins?

ESB ríkið Slóvakía vill að lög þeirra gangi framar ESB í mikilvægustu málum. Hvers vegna ætti EES ríkið Ísland að samþykkja almennan forgang ESB reglna?

Á sama tíma og kjörnir fulltrúar á Alþingi Íslendinga vinna að því að lögfesta frumvarpið um bókun 35 sem kveður á um almennan forgang EES réttar umfram íslensk lög ef þetta tvennt stangast á, þá hafa þau tíðindi orðið á meginlandi Evrópu að löggjafarþing Slóvakíu (sem á beina aðild að ESB) hefur samþykkt að breyta stjórnarskrá landsins í þeim tilgangi að styrkja hefðbundin gildi og verja menningararf Slóvakíu.

Með breytingunni er verið að treysta fullveldi Slóvakíu á sviðum sem varða grundvallaratriði menningar og siðgæðis, þar á meðal um verndun lífs og mannlegrar reisnar, einkalífs og fjölskyldulífs, sem og hjónabands og fjölskyldu. Stjórnarskrá Slóvakíu tekur nú fram að lýðveldið Slóvakía viðurkenni aðeins tvö kyn, karl og konu. 90 þingmenn af 99 sem viðstaddir voru atkvæðagreiðsluna samþykktu breytinguna, vel meðvitaðir um að hún samræmist ekki trú öfgafullra vókista, sem vilja trúa því að kynin séu 37, né heldur búrókrata í Brussel sem telja stofnsáttmála ESB ganga framar stjórnarskrám ríkjanna.

Af stjórnarskrárbreytingunni leiðir ennfremur að foreldrar hafi frjálst ákvörðunarvald um hvort barn þeirra þurfi að sitja í kennslustundum þar sem farið er út fyrir skyldubundið námsefni, þar á meðal kennslu er varðar kynlíf og kynhegðun. Samhliða er lögfest karlar og konur skuli fá greitt á sömu forsendum fyrir sambærileg störf.

Ákvörðun slóvakíska þingsins er skiljanleg í ljósi forsögunnar um kúgun og undirokun sem Slóvakar hafa mátt þola í aldanna rás af hálfu Austurríkismanna, Ungverja, Þjóðverja, Rússa og nú ESB, þar sem Slóvakar hafa lengst af ekki fengið að ráða eigin för. Skilaboð þingsins i gær voru skýr: Við erum fullfær um að stjórna okkur sjálf. 

Athygli vekur að Slóvakía sem gerst hefur aðili að ESB skuli hafa þrótt til að verja sjálfstæði sitt í þeim málum sem meirihlutinn þar telur mestu skipta, á sama tíma og íslenskir þingmenn vilja að Ísland, sem aðeins tengist ESB á grundvelli samnings um efnahagslegt samstarf, samþykki almennan forgang reglna frá ESB án þess að leggja nokkuð á síg til að takmarka gildissvið slíks forgangs. Fyrir hvern eru þessir íslensku þingmenn að vinna?

 

 

 

Opin spurning

Fyrir þá sem hafa gaman af því að leggja saman tvo og tvo og telja sig hafa vitsmunalega burði til að draga rökréttar ályktanir, þá er hér verðugt umhugsunarefni:

Er mögulega eitthvert samhengi milli þess hvernig íslenskir stjórnmálamenn keppast við að innleiða hér heimsmarkmið SÞ (í stað þess að verja íslenska hagsmuni og íslenska menningu); auka áhrif ESB hérlendi m.a. með því að gengisfella Alþingi (í stað þess að annast löggjöfina sjálfir í samræmi við loforð sín til kjósenda), valdefla NATO og hækka sífellt fjárveitingar til stríðsrekstrar / vopnakaupa / heræfinga (í stað þess að vera málsvarar friðar og sátta); framfylgja stefnu WHO í heilbrigðismálum (í stað þess að reka sjálfstæða heilbrigðisstefnu út frá aðstæðum á Íslandi).... og þeirrar sjáanlegu þróunar að sömu stjórnmálamenn leiti skjóls hjá SÞ, ESB, Evrópuráðinu, WHO o.fl. eftir að stjórnmálaferillinn rennur út í sandinn?

Kveður stjórnmálin og einbeitir sér að ráðgjöf

Wall of Fame eða Wall of Shame? Ykkar er valið kæru alþingismenn.

Ef þú værir að byggja hús, myndirðu sætta þig við að pipulagningameistarinn segði við þig að hann vissi ekki hvort skólplögnin myndi halda, en að tíminn myndi leiða það í ljós? Á þessa leið leyfir innviðaráðherra Íslands sér að svara í viðleitni hans til að bjarga ásjónu sinni og flokksins síns þegar komið hefur í ljós að þar tala menn með klofinni tungu. 

Á sama tíma og þetta gerist afhjúpar Bandaríkjaforseti "Wall of Fame" í Hvíta húsinu með myndum af öllum forsetum Bandaríkjanna, nema einum: Í stað ljósmyndar af Joe Biden má sjá mynd af vélstýrðum penna (e. Autopen). Myndin felur í sér áminningu og gagnrýni á þá afbökun stjórnarfarsins sem tíðkaðist í forsetatíð Biden, sem fólst m.a. í að vélpenninn samþykkti 2,5 milljarða dollara framlag til Úkraínu meðan Biden var í fríi í St. Croix, sbr. meðfylgjandi mynd. Á sama tíma undirritaði penninn náðunarbréf, slakaði á landamæragæslu o.fl. Meirihluti Bandaríkjamanna sættir sig ekki við slíkt vélrænt og ábyrgðarlaust stjórnarfar og krefst þess að vita hverjir stýrðu pennanum og fóru þannig með vald forsetans í fjarveru hans. Forseti USA er kjörinn af fólkinu til að fara með vald og ábyrgð, rétt eins og Alþingi Íslendinga er kjörið til valda og ábyrgðar. Í USA er litið á það sem stjórnarfarslegt hneyksli að vald forsetans hafi verið yfirtekið af óþekktu og umboðslausu fólki, enda brjóta svona ,,vinnubrögð" gegn grundvallarviðmiði vestrænnar stjórnskipunar um jafnvægi milli valdaaðila (e. checks and balances). 

 

Á Íslandi leyfa ráðherrar í ríkisstjórn sér að tala eins og þeir beri enga ábyrgð og að þeir megi samþykkja lög í von og óvon um að þau standist stjórnarskrá. Það er rangt. Alþingi getur engin lög sett sem brjóta gegn stjórnarskrá og í vafatilvikum á stjórnarskráin að njóta vafans, ekki EES samningurinn, því stjórnarskráin er okkar æðsta réttarheimild.

 

Vilji menn tala um ólögmæta meðferð forsetavalds í Bandaríkjunum á valdatíma Bidens sem stjórnarfarslegt hneyksli, þá skortir orð til að lýsa því sem gerst hefur á Íslandi síðustu áratugi þar sem Alþingi hefur samþykkt, án undantekninga, ALLT það regluverk sem ESB hefur þóknast að póstsenda okkur til samþykktar og innleiðingar, án þess að nokkur einasti maður á þingi eða í ráðuneytunum sjái til botns í þeim þúsundum skuldbindinga sem þessar reglur hafa lagt Íslandi á herðar. 

 

 

Ég hef sagt það áður og ég skal segja það aftur: Engin þjóð getur búið við slíkt bremsulaust stjórnarfar án þess að þurfa að gjalda það dýru verði. Því það er rangt og afvegaleiðandi sem dómsmálaráðherra o.fl. fullyrða, að í þessu felist aðeins réttindi fyrir Íslendinga. Augljóslega felast í þessu alls konar skyldur, og ef þessu linnir ekki þá munu skuldadagarnir munu koma yfir íslenska þjóð eins og þjófur að nóttu.

 

Vélræn og bremsulaus innleiðing Alþingis á ESB reglum er ekki í samræmi við góða lagasetningarhætti, því lög á að setja að frumkvæði kjörinna Alþingismanna og að undangenginni alvöru umræðu.  Í raun er þessi framkvæmd hrein og klár niðurlæging fyrir þjóð sem á stjórnarskrá og kýs sér ennþá fulltrúa á löggjafarþing í þeim tilgangi að þeir gæti réttar Íslendinga. En þessi framkvæmd er þó ekki aðeins niðurlægjandi og þetta er ekki aðeins til marks um lausung í lagasetningu. Þetta sjálfvirka afgreiðslu- og undirritunarferli felur í sér viðvarandi brot gegn þeim skyldum sem handhafar íslensks löggjafarvalds hafa undirgengist með þvi að vinna drengskaparheit að stjórnarskrá lýðveldisins. Rétt eins og pípulagningameistari getur ekki vikið sér undan ábyrgð og sagt að hann voni það besta, þá leyfist ráðherrum í ríkisstjórn Íslands ekki að vísa ábyrgð á Hæstarétt. Hæstiréttur fer ekki með löggjafarvaldið, heldur þingmenn og ráðherrar sem til þess hafa verið kjörnir. Verði þetta ekki stöðvað núna munu síðari kynslóðir setja upp "Wall of Shame" í þinghúsinu með innrömmuðum andlitsmyndum af núverandi þingmönnum og ráðherrum.  

 

 

Styður bókun 35 og treystir niðurstöðu Hæstaréttar

Fyrir hvern er ,,reiðufés-ráðherrann" að vinna?

Meðan Matthías Á. Mathiesen var fjármálaráðherra mun það hafa gerst að hann fallbeygði orðið fé ranglega í viðtali og talaði um notkun ,,fés" en ekki ,,fjár" og var eftir það kallaður fésmálaráðherra af gárungunum. Þetta rifjast upp þegar þessi frétt er lesin þar sem segir m.a. að verið sé að kortleggja mögulegar takmarkanir sem komi ,,til greina koma við notkun reiðufés". 

En að öllu gríni slepptu, þá er fréttaflutningur af áætlunum íslenskra (ó)ráðamanna hættar að vera hlægilegur og farinn að verða ógnvænlegur. Ég hef nefnilega lesið áætlanir Sameinuðu þjóðanna fyrir næstu árin og líka séð hvað er að gerast á meginlandi Evrópu þar sem ríkisstjórnir ganga sífellt lengra í innleiðingu heimsmarkmiða SÞ og niðurnjörvun borgaranna með síauknu eftirliti þar sem allt á að verða háð leyfisveitingum hins opinbera. 

Kenning mín, sem ég lýsti í þessu útvarpsviðtali hér í síðustu viku, þess efnis að ríkisstjórn Íslands vinni að því að koma stjórn landsins í hendur fólks sem enginn hefur kosið, þ.e. til ESB og SÞ, tekur því miður á sig raunsærri mynd með hverjum deginum sem líður. Ef menn fara ekki að vakna úr rotinu og verja sjálfa sig þá verður haldið áfram að keyra yfir okkur með auknum ríkisafskiptum og sífellt fleiri boðum og bönnum þar til einstaklingurinn hefur varla frelsi lengur til að anda án afskipta ríkisins.

Það sem fyrir stuttu síðan hljómaði sem fráleit samsæriskenning er að raungerast fyrir framan augun á okkur. Spádómar ,,álhattanna" eru m.a. þeir að ríkisstjórnir í Evrópu og víðar séu að vinna að því í sameiningu að koma á:  

- Einni ,,ríkisstjórn" fyrir heiminn, samhliða afnámi þjóðríkisins, með einu sameinuðu lögregluliði, með einum gjaldmiðli fyrir allan heiminn, með afnámi einkaeignarréttar, með ítrekaðri skyldubólusetningu fyrir alla, með því að banna fólki að eiga bíl, takmarka flugferðir, takmarkað aðgengi að frjálsri náttúru, matvælaframleiðsla verði öll miðstýrð o.s.frv. 

Dugar þetta til að fá þig til að opna a.m.k. annað augað? Ef ekki, þá vona ég að þig dreymi fallega og að þú búir þig undir að vakna inn í annan heim en þann sem þú sofnaðir út frá. 

 

Notkun á reiðufé mögulega takmörkuð

Raunveruleikinn er heimsálfa sem íbúar La-la lands þyrftu oftar að heimsækja

Í sjónvarpsviðtali við Guðna í Sunnu fyrir mörgum árum tjáði Guðni sig um það þegar hann fór í samkeppnisrekstur við ,,Kolkrabbann" á Íslandi. Spurður um skýringar á góðum árangri sínum sagði Guðni: ,,Gæludýr þrífast ekki vel í frjálsri náttúru". Hið sama má segja um svo margt annað sem mennirnir ala við brjóst sitt, hvort sem það eru fagrar hugmyndir eða göfugar hugsjónir.   

Í dag voru fundargestir hjá SÞ minntir á að hreinskilni á sér of fáa málsvara í sal sem iðulega er fylltur með innantómum orðum. Bandaríkjaforseti hélt ræðu á allsherjarþingi SÞ sama dag og forsætisráðherra Íslands. Sú síðarnefnda notaði tímann til að státa sig af stöðu jafnréttismála á Íslandi á meðan sá fyrrnefndi benti á að jafnréttið stendur á brauðfótum meðan ríkisstjórn Íslands og annarra Evrópuríkja stuðla að taumlausum innflutningi fólks frá öðrum menningarheimum þar sem konur, samkynhneigðir o.fl. eru annars flokks borgarar. 

Áhugamenn um stjórnmál sjá hér tvær gjörólíkar ræður: 1. Forsætisráðherra smáríkis sem státar sig af stöðu sem hún bjó ekki til sjálf og vinnur sjálf að því að skaða. 2. Valdamesti maður heims stingur á fjöldamörgum uppblásnum blöðrum sjálfsupphafningar og ósanninda sem fjölmiðlar hafa blásið út í boði þeirra sem misnotað hafa pólitískt og peningalegt vald síðustu ár.

Nýjasta viðurkenningin á þeirri ritskoðun, þöggun og umræðustjórnun sem viðgekkst í ,,kófinu" birtist í dag á vef Bandaríkjaþings um það hvernig Google og Youtube gengu erinda þeirra sem stýrðu því hvað mátti heyrast og hvað ekki. Hér er fulltrúi Biden stjórnarinnar að lýsa því hvernig samfélagsmiðlar voru ,,hvattir" til að ritskoða efni sem Biden-stjórnin var ósammála. Þessi vinnubrögð studdi Fjölmiðlanefnd dyggilega með því að ganga til ,,samstarfs" við Facebook í viðamikilli alþjóðlegri ritskoðun með þeim ,,árangri" að þúsundir myndbanda með ,,röngum upplýsingum" voru ,,fjarlægð" af netinu. 

Nýkominn af kristilegri samkomu þar sem æðstu menn Bandaríkjanna töluðu út frá sinni kristnu trú, benti forseti Bandaríkjanna á að ,,leiðtogar" Evrópu tilbiðja falsguði í formi kennisetninga sem þeir hafa sett á stall og kosið að tilbiðja í stað Guðs, þar á meðal loftslagskredduna sem sett hefur myllustein um háls Evrópuþjóða á meðan Kína og fleiri þjóðir soga til sín evrópska iðnaðarframleiðslu með kolaknúnum orkuverum. 

E.S. Margt má segja misjafnt um forseta Bandaríkjanna - eins og okkur öll hin - en hvað má segja um starfsfólk SÞ sem fannst það góð hugmynd að slökkva á rúllustiganum þegar hann var kominn í neðsta þrepið og slökkva svo á textavélinni sem Kristrún Frostadóttir fékk að nota sama dag? Það má kallast ljóðrænt réttlæti að ,,bilunin" olli því að DT fékk framlengdan ræðutíma sem hann notaði svo eftirminnilega í dag. 

 

,,Bílfluga" kennir broddflugu dýrmæta lexíu

Á langri bílferð um daginn sat ég uppi með leiðinlegan laumufarþega, sem var auk þess uppáþrengjandi og slepjuleg með óþægilega nærveru. Þessi ferðafélagi var spikfeit fluga sem stakk sér inn í bílinn í upphafi ferðar og neitaði að yfirgefa hann þótt allar gáttir stæðu henni opnar í sterkum vindi sem hefði getað frelsað hana um leið og hún sleppti takinu á innviðum bílsins. Ítrekaðar tilraunir mínar til að opna gluggana og m.a.s. til að fæla hana út með handahreyfingum dugðu ekki. Minnugur þess að svona ,,farþegar" hafa orsakað bílslys þegar reynt er að drepa þær á ferð ákvað ég að umbera þetta þar til komið yrði á leiðarenda og ég gæti gefið mér tíma til að fremja annað hvort snyrtilega aftöku eða kurteislega brottvísun. En þá tók ekki betra við, því þegar ég loks hafði ,,vopnast" og opnað allar hurðar upp á gátt, þá sá ég að kvikindið vildi hvergi fara og flaug í hringi inn í bílnum í stað þess að fara út. 

Óvísindaleg skýring mín á þessu háttalagi er eftirfarandi: Flugan er ekki bara ljót og leiðinleg, heldur líka svo heimsk að þegar hún hefur flogið nokkra hringi í litlum bíl heldur hún að bíllinn sé veröld hennar og að ekkert sé á bak við glerið annað en blekking. 

Þegar maðurinn skipar henni að fara og lifa í frelsi, nærast og fljúga eins og henni er ætlað, þá svarar hún: ,,Það er ekkert til sem heitir ytri veruleiki. Það eina sem er áþreifanlegt og raunverulegt er það sem ég sé hér og get setið á (og flogið á). Hver sem reynir að sannfæra mig um annað flytur fram samsæriskenningar / elur á upplýsingaóreiðu / setur fram hatursorðræðu". 

Þótt þessi feita fluga hafi augljóslega áður lifað við bestu skilyrði í frjálsri náttúru og fengið ómælt lífsþrek, þá var hún búin að gleyma því og afneitaði allri hvatningu til leiks og frelsis sem vitfirrtri samsæriskenningu / upplýsingaóreiðu. Hvers vegna? Af því að skjáirnir (bílrúðurnar) segja henni aðra sögu og sú saga er bláköld, lífvana og lokuð. Í gegnum skjáinn má að vísu sjá liti og líf, en allt sem er handan skjásins er óraunveruleg blekking. Það vita allir sem nógu lengi hafa lifað umkringdir glerskjám, eins og þessi ,,spakvitringur" hér, sem veit hvenær samsæriskenning verður að sannleika.

Þegar ég loksins losnaði við hana hafði ,,bílflugan" kennt mér dýrmæta lexíu: Það er sama hvað ég hrópa, kalla og veifa, þeir sem orðnir eru ,,skilyrtir" af lífi á bak við glerskjái munu neita að trúa því að til sé annar veruleiki á bak við skjáinn, víðara samhengi, önnur sjónarhorn, líf í fleiri víddum og fullri gnægð. Ég lagði frá mér ,,vopnin" og lofaði sjálfum mér að taka mér frí frá því að reyna að vekja fólk. Menn verða að fá að velja sinn eigin veruleika, sinn eigin lífsstíl, sína eigin lífslygi.  

Ég hef sagt það sem ég tel mig hafa þurft að segja - í bili. Um leið opnast tækifæri til að rækta það sem gefur ávöxt.